Nordost QBase Reference 電源分配器

Nordost QBase Reference

終極電源解決方案？無濾波、無限流！Nordost QB10 電源分配器試聽評測｜集齊 QPoint、QWave、QSine 技術

按以下連結可到【哔哩哔哩】Hi Fi发烧台频道：

Nordost QB10 旗艦電源分配器試聽評測

https://www.bilibili.com/video/BV1NcbS6oEdz/?share_source=copy_web&vd_source=a13594dbeaf4ec234eac0be3d87ceda9

Nordost QBASE Reference QB10 電源分配器——終極被動派旗艦之選

文：Lee388（HiFi發燒台）

發燒友玩電，從來都係一場取捨。要濾波，怕動態壓縮；要隔離，怕音色扭曲；要插夠位，又怕排插太雞。市面上主動式電源處理器五花八門，但講到尾，最直接、最冇妥協嘅方式，往往係最原始嘅「被動式」分配——只要條路夠通、阻抗夠低、干擾夠少，就已經贏咗一半。Nordost 最新旗艦 QBASE Reference QB10，就係將呢個理念推到極致嘅作品。

由 QB8 到 QB10——技術、體積、重量全面昇華

熟悉 Nordost 嘅朋友，一定聽過 QBASE 系列，由早期 QB8 到 Mark III，一直係發燒友心目中「靚聲排插」嘅代表。但今次呢部 QB10，完全係另一個層次嘅產物。機身由長條形改為厚重長方形金屬箱體，深 200mm、高 145mm，重量達 11.75Kg，插滿重型電源線都穩如泰山，唔會再出現 QB8 常見嘅「線材扭力令排插傾斜」嘅尷尬情況。

插座由 8 個增至 10 個，對於現今玩串流、CAS、數碼訊源嘅發燒友嚟講，絕對係「夠用有餘」嘅數目。輸入插座升級為 20A IEC，旁邊仲設有獨立接地端子，方便外接 Nordost QKORE 或其他品牌地盒——筆者手頭冇 QKORE，試接 Acoustic Revive RGC-24K，背景寧靜度即時再下一城，足見其接地設計嘅靈活性。

內部架構——星形接地 x 雙 PCB x 單芯線

QB10 嘅核心係「星形接地拓撲」，所有訊號地線匯聚於一個「Primary Earth」主接地點，廠方建議將前級或合併機接駁此位，以達致最低阻抗、最一致嘅接地路徑。內部採用雙 PCB 設計，接線用上 Nordost 專利 Micro Mono-Filament 單芯線，確保傳輸路徑最直接、最無阻。

最值得一提係機底隱藏嘅一個特別開關，當你用雙單聲道後級或兩部合併機玩 Bi-Amp 時，可以將機背中間兩個插座嘅地線連結埋一齊，形成「雙主接地點」，令兩部機嘅接地阻抗完全一致，實現最理想嘅星形接地效果——呢種對細節嘅執著，正正係 Reference 級數嘅體現。

內置 QRT 三寶——QPoint、QWave、QSine，面板一按即玩

以往玩 Nordost QRT 配件，QWave、QSine、QPoint 都要佔用排插位或外置盒仔，今次 QB10 直接將三者「內置」於機身，唔單止慳位，仲可以透過前面板兩個圓形按鈕獨立控制左右兩組插座：

按一下著藍燈 → 開啟 QWave（主動式波形修正，提升動態與能量感）
再按一下著紅燈 → 開啟 QSine（對抗 RFI 射頻干擾，增強空氣感與透明度）
再按一下著綠燈 → 兩者同時啟動
再按一下 → 全部關閉

用家可以按器材特性靈活配搭：例如左邊插數碼/網路器材開 QSine，右邊插模擬器材開 QWave，甚至按自己口味逐組微調，玩法極之彈性。

聽感——無色無味，只有更靚嘅音質

呢部 QB10 最令我欣賞嘅，係佢完全冇「加把聲」——唔會改變器材本身嘅音色，唔會收窄音場，唔會令聲音變薄變乾。相反，佢提供嘅係一個極度寧靜、極低底噪嘅平台，令每件器材都可以「盡情呼吸」。

試聽時，背景黑到一個點，樂器同人聲嘅結像精準得似換咗支更高級嘅鏡頭，焦點清晰，輪廓立體，主體從背景中「浮」出嚟。最驚喜係聽結他彈撥或大提琴拉弓嘅微動態，嗰種實體感同生命力，完全唔似由排插出嚟，反而似係直接駁牆插——但背景又靜過牆插好幾班。動態毫無抑壓，聲音保持流動同鬆容，呢種「冇處理嘅處理」，正正係被動式設計嘅最高境界。

玩盡佢嘅秘訣——Sort Füt 機械接地

機底四角已預裝四隻 Sort Füt 機械接地承腳，內藏超硬陶瓷珠。由於四隻腳設計，正常總有一隻會「掂唔實」枱面。筆者建議擺好位後，左右對角輕輕搖吓佢，搵出邊隻腳唔穩，然後慢慢扭嗰隻腳至剛剛接觸枱面，再試搖吓機身，直至四平八穩——咁樣唔單止機械接地更徹底，連力感同結像都會再實淨幾分。

總結——貴買平用，旗艦級一步到位

如果硬要講缺點，就係價錢比 QB8 貴咗一截，對於現有用家嚟講，升級成本唔低。但計清楚條數，QB10 已內置 QPoint、QWave、QSine 三種 QRT 技術，唔使另外買盒仔；機身已跟 Sort Füt 承腳，唔使再買釘墊；插座多兩個，仲有雙接地模式——以「一次過解決所有電源分配問題」嚟計，其實係「貴買平用」嘅聰明投資。

若你追求極致級數、完全無抑壓、無染色，又鍾意有啲嘢可以自己調聲，Nordost QBASE Reference QB10 絕對係現時市場上其中一款最具競爭力、值得細意品嚐嘅頂級電源分配器。

一句到尾：插咗落去，你套機會變得更似「自己」，但係靚聲咗好多個層次。